كباية مكياطة ... الجزء الثاني من الحلقة السادسة ... ان العرق دساس

قعدنا فى الكافي للساعة 4 الفجر ... بعدها قلت لصاحبي كيف الراي .. قالي اسمع نحن نطلعو انا وياك بيهن من هنا ونمشو انتمشو فى اي مكان ولا شنو رايك .. قلتله اوكي ماعنديش مشكلة ... المخلوق هضكي سمعنا وقالنا اوكي هيا نطلعو !!! تي انتو شنو حشرك فى النص اصلاً .. نحن هاربين منك ... طلعت انا وصاحبي وكلمت البنات وقلتلهم هيا اطلعن .. مانندري علي شي الا المخلوق جايني وقالي يا هيثم دامكم انتم تبو اتروحو خلاص معناها كلام بيني وبينك عطيني حق الكافي لانة نسيت الفلوس فى الشقة !! قلتله اوكي .. مديتلة الفلوس و استنين صاحبي و البنات نبو نطلعو ... مانندري على شي الا البنات طالعات و صاحبي و المخلوق هضا .. وقالن هيا نمشو للمكان اللي تبوه ... ولا بلاش منه لانة بعيد و توا ايخوف ؟؟؟؟ اي مكان اسم الله انا ماقلت نبي نمشي لمكان !!!! المخلوق تدخل هنا وقال : اي انا قلتلهم اننا عازمينهم على سفح الهرم ونمشو نركبو خيل ؟؟؟؟  خيل توا الساعة 4 الفجر !!! كيف ايصير يا بو صاحب !!! انكلم فى صاحبي ... رد عليا صاحبي وقال : والله ماني عارف يا هيثم هو خش وقالنا انك انت عازمنا على ركوب الخيل فى الهرم ... بيني وبينكم انا انفجعت وفي نفس الوقت ماعرفتش انرد .. قلت هكي معقولة انهزب صاحبي قدام بنات ... هيا مش مشكلة وكيف ماهم خلاص متفقين حتى انا نمشي ... تخيلو عاد انتم الموقف .. 4 الفجر وقاعد انت و ثلاث بنات و راجلين ... شوفو عاد شنو الرعب اللي راكبلكم ... طبعاً كنا لابسين لبس محترم مش لبس كاجوال على اساس ركوب خيل .. لالا كنادر و سراويل قماش ... ركبت الحصان وصارت قصة طويلة عريضة ... خلوها مش وقتها نحكيها توا ... لانها ماعندهش اي اهمية فى القصة ....

بعد ماركبنا الخيل و روحنا للشقة الساعة 7 الصبح ... لنقاني انا رقالي بكل من اللي صار .. وقلت لصاحبي خلاص مش فيها هيا نمشو نحجزو و انروح للاسكندرية .. رد صاحبي وقالي : اوكي هي!!! .. مشينا لمحطة القطار اندورو فى حجز ماحصلنش الا ثاني يوم ... قلت مش مشكلة على الاقل نروحو من هنا بسرعة ... روحنا للمزبلة وقعدنا شوية لحد المغرب .. وبعدها طلعنا للحسين ... قعدنا فية سهرنا و بدا المخلوق يشري فى الهدايا ... بعد خطرها المخلوق كان جايب امعاه 150 جنية ليبي فقط ... للعلم بالشي يعني ... المهم يشري فى الهدايا و صاحبي يشري لكن مش واجد شوية شوية ... ومشا اليوم وجاء اليوم الثاني و اسقدنا للاسكندرية .. واول ماوصلنا لشقتي طول للحمامات نبو انظفو العفن اللي ركبنا ... وبعدها ما نظفنا روحنا من القرف و الهم خشينا عاد للديار ورقدنا ومانضنا الا ثاني يوم ... كسدنا شوية هكي وبعدها اصحابي قالولي يا هيثم خلاص نحن نبو انروحو ... قلت اوكي خلاص مافيش مشكلة .... لكن شنو السبب مازال ماكملتوش اسبوعين .. قالولي والله فلوسنا اكملن !!!! اكملن ؟؟ امتى اكملن .... تي انا عابي عليكم فى الفلوس ؟؟؟؟ كيف صار يا هيثم حتى انا فلوسك اكملن ؟؟؟ والله انا افلوس قعدن شوية ....

قعدنا تحاسبنا على الصرف وشنو درنا ... لقينا ارواحنا مش زايد علينا شي ... يعني لا سكير ولا بنات ولا ديسكوات ولا شرينا حاجات واجدات ؟؟؟؟ .... امالا وين راحن الفلوس .... ونحن اتحاسبو رن تليفوني ...

انا : الو ..

الصوت : ايوة يا هيثم قول لصاحبك معش يتصل بيا مرة اخرى ؟

انا : منو انتي ؟

الصوت : انا فلانة ...

انا : اه اهلاً اهلاً شنو الجو كيف حالك ...

فلانة : تمام الحمد لله ... قول للمخلوق معش يتصل بينا بكل ...

انا : كنا كيف صار ؟

فلانة : هو يتصل بيا ديما وايقولي تعالي للاسكندرية وانا تو انضيفك فى شقتي ... وقاعد ابروحي فى الشقة ...

انا : اسمعي يا بنت الناس ... من وين جابة رقمك ؟

فلانة : انا عطيتة لة لكن على اساس انة صاحبك و معرفتك ومانحسبش هكي قليل الادب ويحسابني وحدة من الصايعات ...

انا : باهي خلاص اوكي تشاو توا ...

فلانة : تشاو ...

سكرت انا منها وحكيت لجماعتي على اللي صار فى التليفون ... طبعاً كلهم اتفلو عليه وسبوه .. ولما ردينا انتحاسبوا معرفنش الفلوس وين راحن ... شوية قلنا الفلوس كانن عند المخلوق صح .. قلت اه كانت عندة .... لكن مشيت القاهرة طلعت كلها مني راهو ؟؟؟؟ اصحابي قالو : كيف كلها منك نحن المخلوق جانا وقالنا هيثم ماعندش فلوس و متحشم منك فعطيناله الفلوس على اساس ايخلص علينا ... رديت انا وقلتلهم : امالا اقسم بالله كيف مانحكيلكم .. كل مانقعدو فى مكان ايفولي الجماعة ماعندهمش فلوس و متحشمين منك و انا انخلص فية .. وانا على خاطر ندفع بالفيزا عندي اهي الوصولات .. ووريتهم الوصولات ...

انفجعو هما ... عرفنا ارواحنا اننا خذينا كف سمح على اوجوهنا ... و اللي جايين بي 3000 دولار روحهو امغير بي 200 دولار بس ... اول ماجاء هو للشقة قلناله انت كم جايب امعاك من ليبيا .. قال جايب اللي يسدني ... متذكرين صاحبي الثالث اللي جاي وعدى سكن ابروحة هو اللي قالنا راهو جاي ب 150 جنية ...  لما واجهناه دار روحدة متعقد وقعد يب وايقول شنو اتسرقو فيا ولا شنو ... كيف انسرقو فيك .. تي انت الهدايا اللي جايبهن من الحسين ابروحهم ايطقن ل2000 جنية مصري ؟؟؟ من وين دحيتهن هذينا ....

المهم تعاركنا هذكي اليوم و هتكتلة الشكارة كلها وقلتله انت حتى البنات تحسابهن عاهرات كيف اللي تعرفهن و اتكلم فيهن على قفايا واتقول انا صاحب هيثم وانت لا  صاحبي ولا نعرفك  ونهارتها اتقول لصاحبي ماتحطش السكير فى ثلاجتك ونحن عارفينك اتدير فى العار اكثر من هكي غير اتدير فى روحك شيخ وانت حتى الاسلام مش هاب شورك بكل  .. قريب اتضاربنا لكن حزوها الجماعة .. وهو التز من الحوش ... والجماعة روحو لليبيا و انا قعدت فى مصر ....

اهو كليناها كلنا على وجوهنا وهو نصب علينا فى الفلوس ... مع انة اكثر من مرة جاء يبي ايصلح الوضع لكن نحن قررنا خلاص معش انديرولة اي اعتبار .. وقعدنا انشهرو بية وسط جماعتنا ... 

لكن بعد شنو صحة له ضحك علينا ونصب علينا فى الفلوس ... ونحن غير كلينا الجيفة وراه وخلاص ...

على خاطر هكي سميت القصة ان العرق دساس .. لان النصابة سر فى العرق وهو موجود مهما الواحد حاول ايغير من طبعة .. لكن العرق دساس ...

( راجع الجزء الاول على خاطر تفهم القصة مع بعضها ) ....



كباية مكياطة ... رقم 6 الجزء الاول ... ان العرق دساس ..

انا قريت كلية الاسنان في مصر .. من اولى اسنان لحد ماتخرجت مها .. وكنت ساكن بروحي فى الشقة .. وكنت ديما انكلم فى اصحابي فى ليبيا على اساس ايجوني هنا لمصر على اساس تهدوير و يقعدو امعايا شوية ايونسوني فى غربتي .. حتى لو كانت لمدة اسبوع بس ... جوني وفاجأوني بجيتهم لمصر .. وقرحت بيهم انا واجد بكل ... طبعاً جوني 3 اشخاص .. وبعدها لحقهم واحد رابع .. اثنين اقعدو امعايا فى الشقة ... و الاثنين الاخرين كل واحد وشقتة على اساس فية واحد منهم امه مصرية وعنده شقة فى مصر ...

اصحابي اللي اقعدو امعايا فى الشقة كل واحد جاي وفي يده فلوس ومبلغ لا يقل عن 1500 دولار امريكي .. الكلام هضا كان فى 2003 ... وطبعاً الوقت هضكي المبلغ كان يفتحلك شوراع فى مصر .. يعني تقريباً 3000 دولار امريكي .. غير فلوسي اللي فى حسابي .. والشقة متوفرة طبعاً .. شوفوا الجو النايخ اللي كنا عايشين فية ...

اخر شخص لحق بينا الي كانت امه مصرية كرهنا فى حاجة اسماها صاحب .. وكرهنا فية وفي هله وفي اليوم اللي درناه صاحب بينا ووثقنا فية لدرجة انة كان عنده مفاتيح حيشانا وكان واثقين فية لابعد الحدود ... غير اللي صار و عرفنا المثل اللي ايقول الرفيق قبل الطريق ... ماكنش عارفين ان المقلب يبي ايصير فينا ومن اقرب الناس لنا ... وخلوني انتلكم بصراحة فى القصة هذة ... لانة فية حاجات مش ممكن انة نسقطهم ....

الشخص لما جاء لمصر طبعاً توفيراً لحوشة ونظافة شقتة وعلى خاطر مايصرفش جاء قعد عندنا ... نحن قاعد عادي مش مشكة اصحاب فى بعضنا واهو انونسو بعضنا شوية ... ومتعودين نحن اي واحد يطلع ايجيب حاجة للحوش ايجبلنا كلنا ونحن اتحاسبو وندفعولة الفلوس اللي دفعهن .. الا المخلوق هضا .. مايدفعش بكل ولا لما ايحس انة فية فلوس يبن يندفعن يهرب وايقول نبي انشوف شقتي لان العزوز وصتني عليها .. ويختفي باليوم و اليومين .... ماعدلنش نحن عليه وقعدنا انقولو اكيد جوة خوالة ولا اجدودة .... واحد من جماعتنا كان يسكر ويحب الخمر .. شراء مرة سكير وقال اهو بدال مانرد لحد شقة هيثم اهو شقة المخلوق قريبة انتكو عليها انحطوها شوية فى الثلاجة وبعدها انرد بيها لشقة هيثم ... اول ماخشينا للشقة وشاف الشيش وعرف اننا نبو انحطوهن فى ثلاجتة اتقول ضربة جن وقعد يتنطر وايقول لا شقتي ايجوني فيها هلي .. وكيف انحط الحرام فى الثلاجة .. و البدوع امتاعاته ... استغربنا فى الاول .. تي ماهو انت اتقولنا نبي بنت امعايا فى الشقة ونبي اندير و نبي انخش لديسكو... ولا اتحلل فى حاجات على كيفك و اتحرم فى حاجات على كيفك ... زعل صاحبي شوية كلمتة وقلتلة اوكي ماتزعلش تعال وحطهن عندي فى الشقة و اهو مفتاح الشقة خلية عندك كل ماتبي اتجيب حاجة حطها طول فى شقتي وبلا جميل التي** ....

مرة  ضربت فى راسنا اننا نمشو للقاهرة ... قعدنا انفكرو فى تاجير الشقة و المصاريف امتاعاتنا ... نط المخلوق وقالنا : ولا يهمكم شباب انا ولد خالتي قاعد فى القاهرة غادي وعندة شقة فى ارقى منطقة فى القاهرة وقريبة من وسط البلاد ... قلنا اوكي مافيش مشكلة اهو بالمرة انوفرو حق التأجير ... لما مشينا للقاهرة وشفنا المنطقة اللي ساكن فيها و الشقة اللي كان قاعد فيها .. بالضبط بالضبط الكلب الاجرب مايرضش ايمر من قدامها ... وصف الشقة كألاتي : اول ماتخشي صالة على الزليز ومافيها شي الا فرشة لونها متغير بفعل عوامل التعرية و البكتيريا و الوسخ ... دارين و حمام و مطبخ ... الدارين فيهن سريرين لكن من غير فراشات .. و كتابات مترميات هكي و هكي ... طبعاً لا فرش لا شي ... و الحمام فية حفرة فى السقف على اساس هضا الدش .. وحفرة فى الساس على اساس شيشمة المية ... و الحفرة الاخرى ومافيش داعي انقول ليش ولا كيف شكلها ... و المطبخ بصراحة كل مانتذكرة ايصيرلي اكتئاب من نفسي ... نحن طبعاً صح شباب و عادي لكن مش للدرجة هذة .. راهو فى الاخير نبو انحطو روسنا ونرقدوا فى مكان نظيف و كويس .. مش نرقدو فى مكان انظر يطلع علينا النهار ولا لا ... اه حاجة اخرى الشقة اتقول مرتع للناس .. اللي خاطم ايخش لا فية خصوصية لا شي ...

رقتلنا من الجو اللي صار و طلعنا من الشقة لحقنا المخلوق وقالنا امغير كنكم بس .. خير ولد خالتي  توا عنده اصحابة ..وقعد ايتعذر و ايتحجج .. قلناله : اسمع بصراحة نحن هكي مانقعدوش .. نبو نمشو انشوفو شقة انباتو فيها حتى لو كانت فى الليلة على 300 جنية لكن فى الاخير نرقدو ونحن مطمنين ....قالنا خلاص اوكي توا انكلم ولد خالتي ونمشولة انشوفوة وين و هو يعرف سماسرة شقق ... بهتنا فى بعضنا وقلنا اوكي هيا .. المهم كلم ولد خالتة و قالة انت وين .. قالة انا قاعد فى الهرم .. قالة خلاص انا جايينك ... و لما قلناله كم ياخذ التاكسي لحد غادي .. قال اي تاكسي غير تعالو بس انا نعرف طريقة اسرع و ارخص .. قلنا اوكي ... اهو بالمرة ندهورو فى البلاد وانشوفو كييف الاجواء عندهم ... تعرفوا ركبنا مواصلات وسيارات اول مرة فى حياتنا انشوفوهم .. وناس تشعبط من هنا .. و ناس تعارك على ربع جنية ... طبعاً بخلاف الروائح الرائعة و التفالات اللي من الرواشن و الدخان اللي اتقول قاعد فى محرقة الهولوكوست ... بعد معاناه من المواصلات وصلنا لمكان ولد خالتة .. نزلنا وسلم علينا وعلى اساس يبي يبدا ايهدرز .. قلناله شوفلنا شقة توا ... دار اتصال على اساس واحد سمسار ومشا هو و المخلوق على اساس ايشوفولنا شقة ... بعد ساعة ونص ردو وقالونا حصلنا شقة كويسة و فخمة ومش عارف شنو على 200 جنية ..قلنا اوكي .. قالنا لكن الراجل قال بكرة تستلموها ... تعقدنا شوية وقلنا باهي مش مشكلة .. تو الليلة انمشوها كيف مانمشوها سهر و ضحك ولعب و بكرة لما يطلع النهار نمشوله فى الحوش و ناخذو المفتاح .... المهم كلنا كنا متفقين على الشي هضا ...  قعدنا فى الهرم فى وحدة من القهاوي لحد الساعة 7 الصبح .. وبعدها لنقانه خلاص معش قدرنا نسهرو اكثر من هكي ... قلنا امرنا لله انروحو للمزبلة اللي قالو عليها شقة ولد خالتة و انمشوها كيف مانمشوها .. روحنا للمزبلة و قعدنا انفكرو كيف ايصير فينا و في الفلوس ... كلمناه المخلوق وخلينا الفلوس عنده وقلناله هاك الفلوس خليهن عندك .. ورقدنا نحن بدبشنا .. طبعاً على الزليز لا فراش لاشي .. لكن اهو قلنا نرتاحو هالساعة ولا الساعتين ... نضنا من نومنا تقريباً على الساعة 1 الظهر .. انبهتو هكي ولا هكي مش قاعد المخلوق .. كلمناه قال انا توا ماشي انجيبلكم الشقة اللي قتلكم عليها امس .. باهي امتى جاي يا مواطن .. شوية وجايكم ... باهي بسرعة لانة ماعندنش فلوس ونبو ننزلو ناكلو اي حاجة ...

نزلنا من المزبلة ولقينا قهوة جنبها و قريبة من الطريق الرئيسية .. قلنا اوكي اهو حتى لو جاء تو ايحقنا و ايجي ايخلص من الفلوس اللي عندة .. قعدنا فى القهوة من الساعة 1 الظهر للساعة 6 العشية .. وهو ماشرفش ... رقتلنا بكل .. مش واكلين شي و قاعدين على شاهي بس .. وشاهي اخر من قهوة شعبية ... لما شرف طبعاً مارضينش انهزبوة قلنا الراجل تعبان من مشيتة .. اول ماجاء قلناله كيف صار فى الشقة قال الراجل غلاها و خلاها ب 250 جنية فسيبتها .. يانعندييين اتسيبها ليش اتسيبها شنو انت تبي تدفع حاجة من جيبك ؟؟؟ اللحظة هذكي اصحابي شدوني وقالولي خلاص تو انحصلو وحدة اخرى ... المهم دفعنا حق الشاهي و اللبز اللي كليناه و مشينا ناكلو شوية ... المهم بعد ماكلينا مشينا نهدورو شوية فى القاهرة و شوارعها لحد ماوصلت بينا الساعة 11 فى اليل كلمني صاحبي وقالي يا هيثم لنقانه الجو يعية هكي نبو انديرو اي جو .. قلتله كيف يعني .. قالي لو عندك بنات تعرفهن خليهن ايجن ايكسدن امعانا ... قلتله اوكي ... كلمت وحدة نعرفها من فترة و خليتها اتجي و تقعد امعانا هيا وصاحبتها ... طبعاً المخلوق اول ماشافهن انهبل وقعد يلصق فيهن ... نسيت انقوللكم انه كان خاطب الفترة هذكي لكن كان امحول الدبلة ... المهم خذيناهن ومشينا قعدنا فى وحدة من الكافتيريات ..قعدنا ضحك ولعب و المخلوق لاصق فى البنات لصقة شينة بكل ... لدرجة ان البنات اتضايقن منة ؟؟؟ نحن قعدنا انبهتو فى بعضنا .. على اساس كنه هضا !!! اول مرة ايحق بنات ولا كيف !!! ...

===============================

القصة طويلة شوية ... فخلي الباقي فى الجزء الثاني من القصة ...

كباية مكياطة ... رقم 5 .. ياتاجوراء ماشفتيش عمر

مانيش عارف قصتي هذة كيف نبي نبداها ولا كيف نبي نحكيها ولا شنو اللي انخلي فيها ولا نكتبها كيف ماهي ولا حاجات انحولهن منها احتراماً لصاحب القصة ولا لا لا لا  .....  لكن انا حنكتبها وخلاص وكيف ماتجي اتجي ...

فى مرة من المرات قعدت امصاحب  واحد جارنا فترة لا تقل عن 6 شهور ... شبوب هو صغير فى السن ممكن اصغر مني بخمس سنوات وهو الصراحة كان متمتع بشبابة ... صح حالتهم المادية كانت بالهون لكن كان متمتع بشبابة يطلع مع الشباب و يسهر و عايش حياته ... جوه سمح يعني ...

طبعاً هذكي الفترة هو كان فى ثانية ثانوي و الحمد لله انة كان عنده بدلة العسكرية على خاطر يمشي ويجي بيها للمدرسة ولما ايكمل منها يعطيها لخوه اللي اصغر منة يمشي بيها للمدرسة ماهو للاسف حالتهم المادية بالهون .. يعني شنو بالهون يعني يوم ايتعشى وعشر ايام لا ... عايشين على راتب التقاعد امتاع رب الاسره وخلاص ... وهما 3 اولاد و بنتين ... بصراحة كنا مانخبلوش عليه فى حاجة مش على اساس نعطوة فلوس ولا حاجة هكي لا لانة كان ايرد فيهن الفلوس وايقولنا انا مش شحات .. لكن على اساس انحاولو مانضايقوش علي بوه فى الطلبات كل واحد منا لما تزيد علية حاجة ايمد فيها لواحد منا ونحن نربطوها فى شكارة اكناسة و انحطوها قدام باب حوشهم وانخلو عيل صغير يخبط على الباب و يمدها لهم ... مانبوش انخلوة  ايشوفنا نحن اللي انديرو فى الحاجات هذينا لانة عارفينة عنده كرامة وعز نفس رهيبة ....

مرة من المرات اختفى علينا الشاب يومين .. لا اتصل ولا شي مشيناله فى الحوش ليقناه قاعد قدام الحوش و متنكد استغربنا ..

كنك يا فايح ... كنك متنكد اليوم ..

والله يا شباب شنو انقوللكم ...كساد وحالة مايعلم بيها الا ربي ...

امغير شنو فية بس ... قولنا بلكي انساعدوك ولو عندك مشكلة قولها بلكي انديرولك حل ..

لالا شي مافية شي غير اهو راقيتلي شوية بس ...

تي غير قول بس كنك ولا انت مش امدايرنا اصحابك ...

تي كيف عاد معقولة الكلام هضا ... والله شنو انقول الحاج عندي تعبان ورشلنا للمستشفى وقال لازم اتشيلوه لتونس .. وماغباكم ...

لا حول ولا قوة الا بالله .. باهي ساهله ساهله ... تو ايحلها الله ...

ان شاء الله والله ان شاء الله ...

ثاني يوم فى الصبح واحد من الجماعة كلمنا وقالنا رانا انلموله فى فلوس الشاب واللي تقدرو عليه جيبوه ... فية اللي دفع عشرة دينار وفية اللي دفع 100 .. وكل واحد وقدرتة .. المهم مليناله تقريباَ 500 دينار و شلناهن له .. رفض هو فى الاول لكن بعدها حلقناله عليهن ... خذاهن و اضبطنا كلنا بالواحد وشال بوه لتونس والحمد لله عالجة و كتبوله على العلاج ...

بعد فترة شهرين من جيتة من تونس الدواء امتاع  بوه كمل .. وهو غالي الدواء يعني  مايقلش حق الباكو عن 45 دينار ... وهو ماباش ايقولنا .. ولا جابلنا سيرة بكل .. عدى لواحد جاره و اسلف منه تقريبا 300 دينار وقال لجاره ماتقولش لبويا انا ليش اسلف منك الفلوس و شرا الدواء لبوه من دون مايقوله الفلوس من وين ... وكان واحد جاره انة فى خلال اسبوعين ايردله الفلوس ...

مرن الاسبوعين من دون مايرد الفلوس لجاره استغرب جاره جاء لحوشهم وكل مايسئال عليه ايقولوله مش قاعد .. تي كيف صار عاد جاه فى الصبح مش قاعد فى العشية مش قاعد فى الليل مش قاعد ... جاء بو الشاب وقاله تفضل يا وليدي شنو فية كل يوم اتجي تسئال علي ولدي وعمري ماشفتك امعاه .. رد الجار وقاله : لا يا حاج غير نبي اولدك فى موضوع بس .. رد الحاج : باهي شنو قولي وانا تو انوصلها له لما ايجي ... رد الجار : والله يا حاج ولدك من حوالي شهر اسلف مني مبلغ 300 دينار وقالي تو ايردة ليا ولحد توا ماجانيش بكل ولا حتى قالي اسباب تأخيره .. وانا بصراحة نبي فلوس ...

انصدم بو الشاب .. وقعد يضرب فيهن فى راسة اخماس فى اسداس ؟؟؟ قعد ايقول : تي كيف صار ولدي انا يسلف 300 دينار هكي من دون مايقولي ؟؟؟ وليش مسلفهن ؟؟؟ وكيف يبي ايردهن ؟؟؟ اكيد اكيد قاعد يشرب فى المخدرات .. تو امغير ايجي وانشوفة بس ...

الحاج كلم اولاد عمه وقاللهم اول مايجي ولدي خلوه ايخش وكتفوه ودخلوه للقوراج .. وعلقوه واطلعو ... اول ماخش الشاب رحب بضنا عمى وهما طول كتفوه وربكوة وعلقوه من كرعية وشالوه للقوراج واطلعو ... جاء بو الشاب وبدا على طول يضرب فى ولده ... وقعد ايسب فيه وايقوله هذي اخر تربيتي فيك قاعد تشرب فى الحشيش والهروين هذي اخر ثقتي فيك وهاتلك يا ضرب ويا سب .. والعيل ايعيط لكن مافية حد يسمع فية ...

ام الشاب اول يومين ماستغربتش غيبة ولدها لانه متعود ايبات برا الحوش ولانه كل ماتسئال عليه راجلها ايقوللها جاء وخذا حاجتة وعدى .... وماتندريش ان ولدها متعلق فى قوراج المزرعة وامسكرين عليه .. قعد على الحال هضا اسبوع والبو يضرب والعيل مستغرب من ضرب بوه له ... ولما يسئال فيه علي شنو تضرب فيا شنو درت قالة على الفلوس اللي خذيتهن اتحشش بيهن و تسكري بيهن ... المهم الشاب توفى من الضرب ... والاب فطن لروحة لما معش سمع صوت ولده ... جاء جنبة وقعد ايهز فية اكتشف انة توفى .... معش عرف شنو ايدير ... جرا لوليتة وقاللها الولية معش حقت شي وجت تبي اتعيط سكر فمها وقاللها اسكتي اسكتي خلينا نصرفو فى البلوه هذة ... فى حياته امشقينة وحتى لما توفى امشقينة ... الام انبكمت ومعش عرفت كيف اتكلم ولا تنظق حرف ...

الشاب بالنسبة ليا قعد 10 ايام لا شفتة ولا سمعت عليه حاجة .. انشغلت عليه انا ومشيتله فى الحوش .. سئالت عليه مرة و اثنين وايقولولي مش قاعد ؟؟؟ نتصل بية رقمة امسكر ... لين مافي يوم كلمني واحد من الشباب وقالي فلان عطاك عمره !!! كيف صار كيف الدوه امتى صارت ... قالي لقوه مدفون فى قوراج المزرعة وعليه اثار الضرب ...  باهي كيف اكتشفوه قالي امه مشت بلغت فى راجلها ... المهم فى التحقيق لما جارهم سمع بالكلام اللي صار مشا لبوه فى الحبس وقاله : يا حاج انا قبل مانبيش انقولك لكن والله ولدك اسلف مني الفلوس على خاطر ايجيبلك العلاج امتاعك وهو كان امحلفني اني مانقولها لكي .. اني انا نقضت حلفتي وتو انصيم ثلاث ايام لكن حبيت انقولك بس انا ولدك لا هو امتاع حشيش لا سكير لا مخدرات ... جارهم يحكيلنا وايقولنا اول مابوه سمع الكلمتين هذينا خش فى عقلة و اطلع وقعد ايخبط فى راسة ...

نهاية القصة اليوم ان ام الشاب لحد اليوم تمشي لولدها فى قبره و اتشيل فى كرسي و تحكيله على كل حاجة اتصير فى الحوش عندهم .. ومرة لما كنت امعاها قالتله اليوم شفتلك بنت غزالة وتو نخطبها لكي .. وبعدها قعدت تبكي بعبرة وقعدت اتقول امغير ليش مشيت وسيبتني ... و بو الشاب قاعد مرمي فى مستشفى المجنانين و ايقول : ولدني عيشني وانا قتلته ...

القصة جزء منها حكاها ليا خوه الصغير خصوصاً الجزء اللي دار فى حوش الشاب ...

عرفتوا تو ليش تاجوراء ماشفتش عمر ... لان عمر مش قاعد اصلاً ... عمر عدى

الحلقة الرابعة ... بعنوان : اللي مايندري ايقول عدس

القصة تحتوي على بعض الالفاظ الجارحة .. الرجاء الانتباه ... شكراً لمن نبهني

=============================================================

الاسم : عصام .. العمر28  المهنة  صاحب شركة خاصة ... متخرج من ادراة الاعمال ...

عصام عباره عن النموذج من الشباب المتقي .. ايصلي فى فروضة كلهن جماعة .. ايصوم خميس و جمعة .. يزكي ويتصدق .. يعني هكي مش امقصر فى حق الله عليه ...  وعائلتة عائلة مرموقة فى ليبيا و عائلة غنية من يوم يومها ..تشتغل فى التجاره و مصدر رزقهم حلال ...

فى يوم من الايام مشى صاحب قصتنا الي كلية الاسنان فى طرابلس .. ايام ماكانت فى السيدي لواحد صاحبة .. شاف بنت عجباتة من الهندام والشكل ... راقبها كم يوم وعرف انها ماتكلمش فى شباب وانها اتكلم فى بنات فقط .. انتظر لحد ماقعدت بروحها ومشالها بروحه وقاللها : يا بنت الناس انا لاني جاي انتعرف لا شي انتي عجبتيني وانا جيت نبي نعرف عنوان بيت والدك على خاطر انتقدملك رسمي .. البنت فى الاول انصدمت و هزباته وقالتله شنو تحسابني اي واحد ايوقف عليا .. ولو تبي حوش بويا جديات كنت تسئال علي اسمي وتعرفني انا بنت من فى البلاد بدال ماقاعد كيف الشباب الصايع اللي  يحساب روحة بنات الناس لعبة ....

انصدم عصام من الرد اللي اسمعة و عدى ايكركر فى كرماته اللي طاحت ويسئال في روحة : انا شنو قلت ؟؟؟ انا ماقلت شي غلط .. طلبت منها طلب طبيعي ؟؟؟

قعد يومين فى الموال هضا عصام وايفكر فى البنت و ايجي للكلية ايراقب فيها من بعيد بعيد .. ولما عرف اسمها واسم بوها وعيلتها خذا امة و مشولهم للحوش يخطبو فيها ... البنت اول ماشافاته انصدمت وعرفت انة جاي جاد للموضوع ... الغريبة ان عصام يوم الدفع كتب شيك فاضي وقال لبو البنت : خليها اتخش وتكتب الرقم اللي تبية لانة بنتك تنشرى بمال الدنيا ... البنت لما شافت الشيك كتبت فية ربع دينار ليبي فقط لا غير ... وقالت لبوها : دام هوا قال اني ننشرى بمال الدنيا انا على خاطره انبيعله روحي بربع جنية لان الربع جنية جابلي راجل من ظهر راجل ....

الزواج صار وفرح قعد رابخ اسبوعين .. وسمعو بية اقاصي طرابلس من شرقها لغربها وقعدو اسبوعين يتحاكو بيه ..

العروسان ماكملوش اسبوعين خذاها عصام وعدى بيها لايطاليا و خلاها تقرا الماجستير على حسابة الخاص لمدة 3 سنوات .. و فتح على خاطرها فرع للشركة امتاعة غادي  وقال فى نفسة : حرام انسيبها ابروحها فى بلاد بعيدة هكي ... انعنبوهن الفلوس اللي ايفرقني على مراتي ...

بعد ماكملت الماجستير ردو لليبيا وقعدوا عايشين فى فيلا فى ارقى مناطق طرابلس ... مش حارمها من شي عصام ... كل مايطلع برة البلاد ايشيل فيها امعاه .. على اساس هيا تدهور و تشري اللي فى خاطرها بدال ماهي قاعدة فى ليبيا ... وكان يلبيلها كل اللي تبيه ... وعلى خاطر ماننسش كان عاطيها كل حقوقها الشرعية الزوجية الخاصة وافهموها انتم ابروحكم ...

بعد 3 سنوات عصام كان خاطره فى ولد .. بس هيا قالتله لا مش وقته توا خلينا لحد مانستقرو كويس فى البلاد بعدها انجيبلك بدال الولد عشرة ... فرح طبعاً .. وقال صح عندها حق لانها خايفة عليا وانا مازلت كيف انكون فى روحي ...

فى يوم من الايام عصام جاته سفرة لايطاليا .. قال للمره هيا تمشي معايا لايطاليا .. قالته لا خليني هنا فى البلاد ... قاللها باهي انشيلك عند هلك قالتله لا فكني منهم ... باهي انشيلك لامي .. قالتله لا خليها ترتاح وانا كل يوم عندها اكيد ملت من وجهي .. قال اوكي خلاص ... وكلمني عصام ووصاني علي اهل بيتة وقالي يا هيثم بالله خلي عينك عليهم ورد بالك منهم وهذينا فلوس خليهن عندك مرات يبو حاجة هكي ولا هكي ...

مشيت انا لحوش عصام وخبطت على الحوش وفتحتلة زوجتة وكلمتني من ورا الباب ...

هيثم : السلام عليكم ..

زوجة عصام : وعليكم السلام ...

هيثم : انا صاحب عصام وهو وصاني على حاجة .. بكلي ناقصتك شي حاجة ...

زوجة عصام : لا شكراً بارك الله فيك من قبل مايسافر عصام جابلي كل اللي نبية ..

هيثم : باهي تمام  ربي ايزيد الخير .. المهم يا مدام هضا رقمي وكلميني فى اي وقت ان شاء الله حتى 4 الفجر وان شاء الله مش مقصر امعاك ..

خذت الرقم ومشيت انا فى حالي ...

طبعاً سفرة عصام المفروض اسبوع لكن هو من كثر ماهو ملهوف على زوجتة رد بعد 4 ايام .. كلمني وقالي انا فى المطار تعالي وماتقولش لحد اني جيت ...

مشيتلة للمطار وخذيتة وخذيت الشناطي اللي جايبهن له وقالي اطلع للحوش طول نبي انشوف المره ليا فترة عليها ... اول ماوصلنا للحوش هو خش طول وانا خذيت الشناطي انزل فيهن ...

تعرفوا انا سمعت عيطة كان انقوللكم هزت ليبيا كلها ... خشيت نجري نحسابه لقى مراتة ميتة .. للاسف لقى وليتة فى دار نومة وفوقها واحد .. والله كيف مانحكيلكم فوقها واحد ... الراجل هرب والمرة قعدت تندب وهو طاح على الكرسي ... انا سحبت روحي ومشيت قلت اكيد يبي يذبحها ... ماطقيتش لجزيرة الفرناج لحد ماكلمني وقالي تعال .. رديت وانا نرتعد قلت هضا ذبح الولية وقعد عقلي يشتغل ... اول ماوصلت للحوش لقيتة هو فى الصالون والمرة قاعدة فى الدار وقالي اقعد جايين بوها وخوتها ... انا سكتت ماعلقتش .. اول ماخش بوها وخوها وجوههم كانت سوده .. قاللهم اللي صار .. جابوها البنت لا مش بنت العاهرة .. وشهدوها انهارت وقعدت اتقول سامحوني سامحوني .. بوها وخوها معش عرفوا كيف ايردو ولا ايتكلمو .. خذو البنت وعدو .. وانا قلت لعصام انت مش راجل ... قالي ليش  .. قلتله لو انك راجل وولد راجل راك ذبحت دين امها فى مكانها والقانون الليبي مش حيحاكمك لانك فى حالة دفاع عن الشرف .. قالي معقولة يا هيثم انخش للسجن على خاطر وحدة عاهرة ...

يومين هكي و جاني فى العيادة عصام .. طبعاً حالتة كانت مأساه .. قلت له شنو درت .. قالي خذيت حقي .. كيف باهي حذيتة حقك .. قالي جبت العاهرة وبوها وخوها وخليتهم ايوقعولي على شيكات باللي صرفته عليها كله ولما مشيت صرفت الشيكات واطمنت ان حقي رجعلي رميت عليها اليمين ... بس بالله عليك يا هيثم احكي قصتي لكل واحد اتشوفة ....

العاهرة طبعاً هلها تبرو منها وقاعدة توا بروحها ساكنة بروحها ...

اهو يا عصام نفذتلك رغبتك وحكيت قصتك للكل ... توا بالله سؤال  .. شنو ذنبة عصام ايصيرله هكي ؟؟؟ انا نعرفة يا جماعة وعارفة انة من النوع المتقي .. يعني لا داير ولا لاقي ؟؟؟ لحد توا قاعد انفكر في اللي صار لعصام ... ان شاء الله الله مايطيحنا هالطيحة السودة ...

اه حاجة اخيرة .. من يومها عصام كره اي شي اسماه نساء وخصوصاً الليبيات لانة فى نظره مخبوطات بعصا وحدة

كباية مكياطة ... الحلقة الثالثة بعنوان ... اللي مايعرف الصقر يشوية

نذكر مرة من المرات مشيت لدكتور نسئال فيه على مشاكل النطق اللي عندي وعلى التهتهه اللي فيا وفية حرف مايطلعنش ومرات كلمة بدال ماتطلع في دقيقة ناخذ 5 دقايق على خاطر تطلع ... قالي انت زمان كنت تكتب باليسار .. قلتله ايوه .. قالي وتوا ؟؟ قلتله باليمين .. قالي على خاطر هكي انت قعدت عندك صعوبة فى الكلام .. لانة كنت اتشغل فى نصف مخك اليمين وتوا تداخل معاه نصف مخك اليسار فعقدت اتفكر واجد وديما بالك مشغول وتحسب فى الحاجات اللي قدامك بسرعة البرق وتحسب فى الكلام اللي تبي اتقولة وتقعد حاسب حساب حتى كلام اللي قدامك وعندك الرد ... نصيحتي لكي اتهدي نفسك وخليك هادي .. وماتشغلش مخك واجد لانك اكثر الناس معرضين للزهايمر !!!!

==========================================

اليوم انا مش حاكي علي شي .. لكن هضا كلام اننا ننقلة على لسان واحد من الناس اللي مرة تعرفت عليهم وهو حكاه ليا .. ومانيش امغير حتى حرف منه ...  الشخص اسماه أ.ح العمر 26 سنة .. التخصص مهندس معماري ... الوظيفة سواق افيكو .

الكلام لصاحب القصة كالاتي :

انا من عائلة متوسطة مادياً .. مانيش من الاغنياء ولاني من الفقراء .. انعيشو كل يوم بيوما ..باتي عايش على المرتب وهو حوالي 350 جنية ليبي ... وعندي 5 خوت غيري .. هما الخمسة فى المدارس العامة .. خوذلك عيد توا المدارس العامة كل مرة يطلبو منهم جنية على خاطر حاجات مش عارف كيف يطلعن .. مش المفروض انهن على حساب الدولة لكن ايش انقولو .. مرة ايقولو انجمعو على خاطر انزوقو الفصل .. ومرة انقولو على خاطر انظفوا المدرسة .. ولو فية زردة معناها يبو 2 دينار .. وبصراحة عمري ماطلعت زرادي مع المدرسة على خاطر باتي ماعندش كيف ايجيبهن لنا الفلوس لانهن يادوبك سادتنا لحد يوم 24 الشهر وبقية الايام من الشهر تمشي بالبركة ... باتي اول مايجيب المرتب يمشي هو وامي لسوق الجملة و يجيبو حاجات الحوش الاساسية من الوكال ... وسوق الجملة على اساس انه ارخص من القطاعي فيتكلف كل المواد الغذائية لمدة شهر حوالي 100 دينار .. وعندك طبعاً دبش المدارس و الكراسات وفواتير الضي و التليفون والخ الخ الخ ...

ايام الصيف والعطلات كنت على خاطر انساعد الحاج عندي ناخذ برويطة و انحمل فى سوق الخضرة واهو ربي امسهلها .. مرة تحميلة بخمسين قرش ومرة بجنية ومرة ننضرب لما كنت اصغير ومرة ايجي واحد كبير ايفك مني 3 دينار على اساس هو المسئول على السوق واهو .. تمشي الحياه ...

لما طلعت من المدرسة وبديت فى الكلية كنت نطلع من الحوش الساعة 4 الفجر انصلي الفجر فى الجامعة ونتوكل للكلية لانها بعيدة علي حوشنا .. وبالمرة نلحق حافلة الكلية لانة بصراحة كنت انتحشم كل مرة ناخذ من باتي حق مواصلاتي ومرات انمشيها مع اصحابي بالضحكة واللعبة ايقربوني للحوش وناخذ فى الباقي كعابي لحد الحوش ... ولما ينزلن اوراق المحاضرات انحاول انحاول اني نمشي نقرا عند واحد صاحب على اساس انقولة انا نكتب فى المحاضرات وانت عندك اوراق المحاضرة اللي انزلت وانقارنوهن ببعضهن ونشوفو الاحسن .. على اساس خايف عليه ونبية ايتفوق ونبي انتفوق امعاه مش على اساس ماعنديش حق الشيتات والمذكرات .. ولما تقدمت فى الكلية كنت نمشي لواحد من اصحابي اللي فى كلية الهندسة اللي اكبر مني فى السنة الدراسية او اللي تخرج ونسلف منة الادوات ..من وين نبي انجيبهن وهو الراتب 350 جنية .. وشغل معش فية بعد ماكبرت وحتى لو اشتغلت كم يبو يعطوني وانت ماغباك فى الليبين لما يقعدو هما رؤسائك فى العمل اتقول عبد عندهم ....

المهم بعد ماتخرجت والحمد لله بديت اندور على شغل هنا وهنا.. كل الابواب اسكرت فى وجهي ومعش عرفت وين نمشي .. سمعت عن مرة ان شركة المرافق تعطي فى يومية 40 جنية  مشيت تقدمتلها ولما وافقو روحت لامي وقلتلها زغرتت وبكت فى نفس الوقت .. زغرتت لاني فى اليوم نبي انجيب 40 جنية وبكت على خاطر ولدها متخرج من الهندسة ويشتغل كناس فى الشوارع ... ماعدلتش على صفة العمل ولثمت روحي وبديت فى التنظيف .. كنت انحاول انخلي شغلي فى الليل متاخر بعد ال9 فى الليل نمنع اي واحد ايحقني من اصحابي اللي كانو فى الكلية ولما ايكلموني فى الصبح وايقولولي تعال انتقابلو انتهرب منهم وانقوللهم مانقدرش ماشي لعمي فلان وخالي فلان ... مع العلم انة مانمشيلهمش الا فى الاعياد والمناسبات فقط لانة جديات انا حاقد عليهم ... الله رازقهم وواكلين حق بويا وهما ايحقو فينا مزرطين فى شقة دارين وحمام ومافيش حد فيهم يسئال علينا بكل ...  قعدت فى خدمة المرافق 10 ايام بالضبط وبعدها قالونا خلاص معش فية خدمة استغنينا عن العمالة الليبية .؟؟؟ وعطو لكل واحد فينا 150 جنية ... باهي وين الباقيات قالو لما ينزلن الفلوس !!! طبعاً احتسبت امر الله فيهم ومشيت ... وقفت مع المصرية ودرت روحي تونسي وقعدت انحمل امعاهم .. يوم تصدف واسبوع لا ...

بعد فترة مشيت وتقابلت انا وواحد من اصحاب الكلية ونشكيلة من اللي فيا وكيف اني قعدت عالة عليهم فى الحوش لاخدمة لا قدمة ... قالي تعال انا عندي حافلة ايفكو اشتغل عليها ... فرحت انا فى الاول وتوكلت على بركة الله وبديت فيها .. اول الشهور حط معايا واحد على اساس انا انسوق وهو ايحدد الخط وياخذ الفلوس ... وبعدها الشخص اللي حطة بديت انشوف فية ياكل فى الفلوس ...قعدت عندي خبرة فى خطوط الايفكو والتسعيرة .. مثلاُ بدال اليوم انكون جبت فيها 300 دينار نلقاهن 270 دينار .. استغربت فى الاول لكن بعدها فطنتله اللي يسرق ومشيت قلتها لصاحب الحافلة ... الحمد لله صدقني وقالي بارك الله فيك ... وثاني يوم لقيت الشاب اللي كان امعايا جابلي قريب 5 انفار وصارت عركة قى محطة الرشيد .. كيف تسرقني ياكلب يا حيوان وخوذلك من الالفاظ هذينا ... بعد ماهدت الامور صاحب الحافلة كلمني وقالي اسمع انت اتوا مهندس ولك وضعك وكيف اتحط راسك بشباب صايع واتعارك امعاهم قدام الناس .. خوذلك راحة فترة لحد ماتهدى الامور وان شاء الله ايجيك تعيينك لحد عندك ....

بيني وبينك عطيتلة المفتاح وشكرته وقلتله ان شاء الله انتقالو على خير ... واهو توا كيف ماتحق فيا ... مسلف قراطيس دخان من محل جنب حوشنا وقال امفرش بيهم فى جامع الصقع ....

================================

انتهى كلام الشاب ... وردي انا ....

ماعنديش ايش انقول انا امغير لا تعليق

كباية مكياطة2 ...تتحمل مايجيها .. بطولة هيثم و البكستا

من قبل ما تقرو القصة راهي فيها كلام شباب ... انا احذر من توا ...

====================================
مرة مرة هكي الواحد يقعد ايفكر فى حياتة وفي روحة وشنو دار في السنين اللي فاتت ... حاجات ايتمنى انة ايحولهن من ماضية بكل .. وحاجات ايتمنى انهن يستمرن وحاجات وحاجات وحاجات ... مرات انا لما نذكر الماضي امتاعي نقعد نضحك علي روحي على الحاجات اللي درتهن سواء كانن بغرض اضحاك الاخرين لكن للاسف تنقلب و يقعدو يضحكو عليا ... هيا مش مشكلة الواحد يقعد فى عمره ايتعلم ...  خاطري نعرف بس اللي قال المقولة اللي فاتت ماقالش امتى ايتخرج .. لكن تقريباً كلنا عارفين امتى ايتخرج .. بطولة عمركم يعني ...
==================================
بطل قصتنا اليوم واحد من الشباب الطبقة الراقية  ... اول حرف من اسمة (آ) عمره فى الثلاثين حتى هو ... خلينا انقولوله اليوم بكستا .. الشخص هضا بصراحة ماعرفتش شنو يبي من الحياه ... كل حياتة عباره عن صبايا و بنات وبس ... حاجة اخرى ماعندش فى الدنيا ... لا يهمة لا قراية ولا يهمة شي ... عايشة علي خاطر متعتة بس ... البكستا هضا جديات عمري ماشفت واحد كيفة فى الجري ورا البنات و الصبايا .. غير اول وحدة اتوريله سنونها يلصق فيها طول ... مايهمش امعاها راجل مش امعاها راجل .. عجوز كبيرة .. عروس جديدة ... اهم حاجة انها انثى وانها دامها ورتلة سنونها معناها تبيه و عشقاتة ... خلينا انشوفو شنو صار امعاه ....
انا : خير يا بكستا ...
بكستا : خير يا شرقاوي شنو الجو شني حالك ...
انا : والله تمام بخير ونعمة الحمد لله .. انت شنو حالك ؟
بكستا : والله يا مان امس تعلق في شي طرف .. اوووووف .. من الاخير ...
انا : تي امتى امس ..انا امس امروح و امسيبك فى الحوش الساعة 10 فى الليل ؟؟؟
بكستا : تي ايه ماهو طلعت بالسيارة الجديدة .. بابايا جايب سيارة جديدة خذيت منة المفتاح ومشيت هيجت فى المدينة ..
انا : باه تمام .. احكي كيف صار عندك ؟؟؟
بكستا : تي وحق ربي يا مان ماتعرف من وين جاية الز*** مش مفهومة بكل ... مشيت وراها من بن عاشور لحد قريب الهضبة ... وانا انكحل و هيا تشبحلي و خلاص ومرة مرة انجي قدامها على اساس اتشوف السيارة لانك عارف فية نوعية من البناويت لما ايشوفو عندك سيارة امليحة اتطيح على وجها و اتقولك بذخ هذا ...
انا : باه .. بعدها ...
بكستا : جيت جنبها بالسيارة و لوحت الرقم فى وجها و مشيت .. ماطاقتش خمس دقايق لقيت رقم يشرينلي .. رديت عليه لقيتة وحدة اتقولي : هكي الناس ولت اتلوح فى الارقام فى وجه الناس ...
انا : وانت شنو رديت عليها ؟؟
بكستا : قلتلها : والله ياعسل اني ماشي وراك من بن عاشور على خاطر تشبحيلي وانتي مش عارف خيرك ..شني مش عاجباتك السيارة انيجبو غيرها ... ولا شني الكلام ؟؟؟
انا : باهي تمام و الاخت الشريفة شنو ردت عيد ...
بكستا : والله يامان شنو انقولك قعدت ناخذ ونعطي امعاها لين ماقالتلي خاطري فى تليفون سوني اريكسون .. قلتلها عادي انجيبولك امالا ليش الفلوس قاعدات .. لكن انتي عارفة مافي شي على الابيض ؟؟؟ قالتلي : خلاص تخلص لحم !!!
انا : لحم !!! كيف لحم اتجيبلك حولي ولا شنو ؟؟؟
بكستا : تي لالالا .. قصدي نلعب فى ريشها كيف مانبي .. واهو مايقعدش حق التليفون راح ابلاش ...
انا : تي باهي يا غبي ... التليفون حقة فوق ال 300 دينار .. وهيا لو قعدت امعاك تقعد ساعة ولا ساعتين !!!
بكستا : تي يا اهبل انت .. اول مرة اي تقعد امعايا ساعتين لكن بعدها لما اتشوفني بذخ اتجيني لحد عندي ونقعد نصرف عليها .. شنو من تبي اتحصل يصرف عليها زي اني .. عايش فى حي الاندلس .. و الحالة فوق الريح .. وفي الاخير هيا قح*** وعارفة روحها اول مانمل منها انلوحها حاشاك كيف ماتلوح فى الكناسة ...
انا : باهي ازعمة ماتحصلنش اتربطنا امعاها ...
بكستا : تي كيف يا مان .. تي انت اول واحد ... تي تعال ... راهي القح*** ليك ولغيرك .. شنو اني انبدل راجل بمراه ... ولو تكلمت تو انلوح على وجها الف دينار اتظم فمها وتسكت وايييح مرات اتقولي لو عندك صاحب تاني هاتة ... تي يامان اني عارفهم الاشكالات هديا .. دامها فيه فلوس ايجنها خلاص ماتفرقش عندها مني اللي خاش ومني اللي طالع ... ولا انت مش عارف المثل اللي ايقول = اللي تفتح كر**** تتحمل ما يجيها ...
انا : اي والله صدقت ... تي باهي باهي ... اسم الله علي انا وخلاص مانحصلو الا فى مص الليم بس ... اسمع بكرة شنو عندك نبي ناخذ سيارتك انفرح بيها هلي ... على اساس انقوللهم اهو ولدكم ايسوق فى سيارة صقع ...
بكستا : اي عادي مافيش مشكلة .. بس امتى تبيها ؟؟؟
انا : والله دير راي لكي .. يعني مش اكثر من ساعة ...
بكستا : اي عادي تفضل اي وقت ؟؟؟
ولما جاء الوقت اللي خذيت فية السيارة طبعاً لا مشيت لهلي ولا فرحتهم ولا الكلام هضا مشيت لفيت بيها شوية فى البلاد وكل مانشوف سيارة فيها وحدة ولا فيها بنات فى الكرسي الوراني نضحك نلقاهم يضحكولي ... نفتح الروشن طول و انقول الرقم ... طبعاً مانحكيلكمش على كمية الاتصالات اللي ايجني فى خلال الاسبوعين هذكينا .. لا و اخرى وحدة تعطي الرقم لصاحبتها و صاحبتها تعطي الرقم لصاحبتها الاخرى .. يعني الرقم ايلف من وحدة لوحدة .. وهلم .. على اللي تفتحلي فى الكاميرا .. على اللي اتقولي نبي رصيد .. علي اللي اتقولي بكرة انا ماشية للفاتح تعال بالسيارة ...
البكستا مازال لحد اليوم قاعد وهايم مع رغبتة ومتعتة ... و الكارثة كل مانحط عيني علي وحدة بعدها بيومين نلقاها امعاه فى السيارة ... تي وصل فى المتخمرات الاخ ومازال يبوني اندور على بنت ناس ... مانعرفش شنو انقول غير منك لله يا بكستا وصحه لكي يا بكستا ...
اما منك لله فهي علي سبة حطمت فى نظري البنت الليبية بكل ... خليتهن كلهن فى نظري ناقص 100 ...
واما صحة لكي  فهي على سبة انت ماتهلب في شي .. اللي تمشي و اتقصع و اتشوف فى المظاهر عرفت كيف تتعامل امعاها ...

كباية مكياطة 1 ... ( لما يحج الديك ) بطولة هيثم و الديز ...

الديز : شاب ليبي عمره ثلاثين سنة .. اسمة الحقيقي م.ح ... شهادة التخرج من كلية الاسنان ... الوظيفة يشتغل فى محله لبيع الذهب ....

انشوفو الحوار اللي صار معانا ...

------------------------------------------------------------

هيثم : دييييييييييييييييزي ....

الديز : ايوة يا جيقا مينا شنو الجو ؟؟

والله تمام الحمد لله ... شنو الجو عندك !!!

الحمد لله بخير ونعمة ...

شنو الجديد ؟؟؟

والله لا جديد كساد و نفخ و خلاص ... الواحد معش قعد يعرف ايش ايدير .. غير ايشدها فى الدكان وخلاص ...

اي والله كساد للسحاب .. حتى مكان تمشيله هنا اتهيج فية ماتحصلش ...

تي وين تبي اتهيج غير قولي بس ... كل المكانات مافيهن وين اتهيج ... غير اتشدها فى السيارة و اتكحل في اللي ماشي وجاي  ولا تقعد على شي قهوه واتسبس الارجيلة ...

ايوة ... لكن حتى التكحيل معش فية .. توا كل ماتبي تطلع و تحكل ماتصدق اتحق وحدة اتسوق سيارة ..تلقى وراها المسيرة الخضراء ... اتقول البنت الوحيدة فى ليبيا .. والمشكلة نص جمالها زواق ....

باهي هي شنو تبي اتدير ماعندك غير هكي ولا اتشدها عكسة فى الشوكة انت و الشباب وتقعد اتقرموا فى خلق الله .. ولما تمشي يقعدو ايقرمو فيك ....

باهي ازعمة وين تمشي اتكحل هنا واغلب البنات عندهن سيارات هاشيات مانعرف من وين ايجيبو فيهن ...

كي كي .. مرطرط .. من يقدرهن يا جيقا ....

تي والله يا ديز كل مانخش لحي الاندلس انشوف فى بنات ايسوقن فى سيارات غير كان نعرف من وين بس ايجبو فيهن الفلوس .. تي اقل وحدة اتسوق فى سياره حقها مايقلش عن 20 الف جنية ليبي .. وتبيني نقعد انكحل فيها .. تي هذينا يبن واحد ايهيج بهيلكوبتر فوقهن بيش بلكي بلكي ايبهتن فية ... ااااااااااااااااااااااخ وخلاص ... كان هنا ايسوقن فى الهوايش هذينا امالا خوهن ولا بوهن شنو عنده ؟؟؟ غواصة ...

تي عادي يا جيقا ... بكرة تفرج عليك و اتجيب نيبرا تقعد اتهيج بيها فى بوسليم .. حتى البنات غادي يشكرو فيهن ...

اي جديات على الاقل لما اتخش لعركة تلقى تحتها البوخوصة ... تي ماتقولي شنو جو الايوان و الجماعة هذينا ...

تي فكك من ايوان الا كان شي معاك وحدة تبي تبذخ عليها !!! لكن غير عن هكي هاوينا مقهى البحاره فى شارع المقريف .. كباية المكياطة بخمسين قرش و تقعد معاك اليوم كله ....

لا ياديزي مكياطة الهافانا فيها جو .. بخمسين قرش حتى هيا وعلى الاقل توقف قدام الكافي و اتشوف فلوس ليبيا وين قاعدات .. متبعثرات على السيارات وعلى الفشاكين ... هيا مش مشكلة .. خليني توا نمشي ننقهر شوية غادي و انردلك ...

تم يا جيقا .. انراجي فيك ...

هيا سلام ..

سلام

========================================

مقهى هافانا الي مايعرفش موقعة فى قرقارش ... قدامة محطة بنزين و غسيل سيارات وواحد امتاع عجل قوميستي يعني .. وبيني وبينكم ماتجرأتش اني نمشي اندير عندة عجل سياراتي .. لانة خايف بعد مانكمل ويقولي السعر معناها نعطيلة السيارة يا رهن و نمشي نسلف بيش انخلصة ... ببساطة اقل سياره اتخشلة لاند كروزر ؟؟؟ معناها انا شنو !!!!

قدام هافانا الطريق ماشية وجاية ..اول مانوقف غادي انشوف طبقات الشعب الليبي الاربعة ... اول طبقة اللي هيا الغنية .. والثانية الفشاكة .. والثالثة الكادحة .. والرابعة الحالمة .... الطبقة الغنية و الفشاكة هن الاثنين تقريباً يشبهن لبعضهن .. سيارات فارهات .. مغسولات ديما طبعاً القزاز الوراني لازم يكون مظلل .. لازم السواق ايتكلم فى الموبايل و ايوزع فى الابتسامات على الشعب ... لا وهو ايتكلم يقعد ايبهت يمين و يسار .. باهي ليش مش عارف.. تي انا لما تليفوني ايرن اندرس السيارة وانتكلم فية بيش انركز معاه .. فكيف وانا انسوق انتلكم و نبتسم  ونبهت فى البنات هكي و هكي !!! لا و الادهى لما ايشوف وحدة اتسوق ايحط النقال على كراعة ويفتح الروشن ويقعد يرمى فى الكلام ؟؟؟ تي باهي اللي انت اتكلم فية شنو !!! ايهدرز ابروحة ولا شنو ؟؟؟ ولا اما انت لا اتهدرز لا شي غير اتوري فى الشعب ان عندة موبايل وانك انسان مهم ... الفرق بين الطبقتين للي يبي الفرق هو رقم طارقة السيارة ....

الطبقة الكادحة اللي تمر و تمشي فى الطريق واهو ايشوف فى السيارات ويقعد يكذب وايقول توا بكرا انجيب وحدة كيفها ... اه ومايجيش للشارع الا من الخميس للخميس ولا وقت العطله ... مش منه يوم عندة حق غسلة السيارة و البنزينة ويوم لا ..

الطبقة الحالمة هذة تعرفها بانها تمشي على اليمين وتقعد اتبهت فى الحواشين على اليمين و اليسار .. وسيارتهم طبعاً لا داوو يا هونداي  يا كوريه ومصفطة من كل تركيبنة .. وتلقى السيارة مليانة بالناس .. يعني عادي السيارة اتشيل 4 تلقى فيها 10 .. بالجو ماهي زردة لهم اصلاً ... ايشوفو الليبين الثانيين كيف عايشين و لما ايروحو لحيشانهم يقعدو يحكو عن الحوش اللي على اليمين و الحوش اللي على اليسار ... طبعاً ميزتهم عارفين كل حوش وين مكانة وكل شبر من الطريق ولو حوش حولوه ولا حفرة زادت معناها تاخذ الخبر منهم هما امتى بالظبط حولوة ... طبعاً الطبقة هذة قصصهم متوارثة ...

مرة فى المرات شفت واحد راكب سيارة مانعرفش شنو هيا ... جديات ماعرفتش موديلها بس هيا سيارة باين عليها للناس البذخ بكل ... مشيت جنبة بالسيارة ونبي نعرف شنو هيا السيارة .. صاحبنا هضا كل متر يوقف و ايسلم على الجماعة و ايهدرز .. عادي بالجو ماهو ملكولة الطريق ... والناس اللي وراه يستنو عادي .. مرات ناسيين شي حاجة يبو يذكروها و حتى ايطبق فى نظام فى العجلة الندامة ... وانا ماشي وراه قعدت انتخيل في انا راكب السيارة وانسوق فيها ... بي بي بي عليك جو سمح يا .. تي بعدين انحول فيها ... ادبشي انخلية فى السياره معش ننزل منها بكل .. ولما ننزل انجيب واحد غاني ونعطية سلاح وانقولة اي واحد يقرب ارمي طول ... و شيخ فى الكرسي اللي جنبي على سبة العين .. وواحد غاني ثاني على سبة لو العجلة اطربقت .. ايغيرها .. مش معقولة تقعد عندي سيارة هكي وننزل انا وانغير العجلة .. عيبة فى حق السيارة صاحبها ايغيرلها عجلتها ...

وانا انتخيل فى روحي في ايش اندير رن تليفوني ... فطنتلة فى اخر لحظة ... زريت على الستيرسو وقلت الو .. بعدها عرفت اني مش فى السيارة اللي قدامي .. درست طول بسرعة وشمرت السماعة ورديت وقلت الو ... رد عليا الديز وقالي  : تي وينك مش باين .. انا : والله يا ديز توا شفت حاجة هايشة مش عارف اولها من اخرها ... الديز : تي شنو سيارة ولا بنت .. انا : اي بنت سيارة ببس ان شاء الله ربي يعطيلي وحدة كيفها ... الديز : ايه ان شاء الله ليش لا .. بس لما ايحج الديك يا جيقا .. انا : تي باهي سكر .. وووه منكم عليك شعب مايتمناش الخير لحد ... لما سكرت السيارة من بعيد درست ونزل صاحبها ...  لقيته الاخ عنده محل ذهب او بالاحرى الماس و احجار ثمينة ... اول ماشفت المحل : قلت اي والله عندك الحق يا ديز .. لما ايحج الديك ... وشكلة صاحبنا امتاع السيارة حج الديك امتاعة مليون مرة